Thursday, December 24, 2009

इतिहास छ रे

मेरो बाजेको इतिहास छ रे
रुँदै हाँसेको इतिहास छ रे

परदेशी हुन नगएस् भन्थे
भाँडा माँझेको इतिहास छ रे

गाउँमा पैसा नहुँदा खेरी
सामान साटेको इतिहास छ रे

पढ्ने लेख्ने त्यो उमेरमा
घाँस काटेको इतिहास छ रे

सुनाउनु मेरो नातीलाई भन्दै
दुःखमा बाँचेको इतिहास छ रे

Sunday, December 13, 2009

यो देशको नारा

बन्द हड्ताल यो देशको नारा
जय नेपाल यो देशको नारा

भन्छन् कृषि प्रधान देश हो
अनिकाल यो देशको नारा

कसरी आउँछन गौतम बुद्ध
संकटकाल यो देशको नारा

बेरोजगारी हड्छ हड्छ
हेरक साल यो देशको नारा

जो सत्तामा पुगे पनि त
आलटाल यो देशको नारा

Tuesday, December 8, 2009

पैसा लाग्दैन...

सोच्न पैसा लाग्दैन
खोक्न पैसा लाग्दैन

समयलाई रोकेर देखाउ
रोक्न पैसा लाग्दैन

नफाल्नु पीरको भारी
बोक्न पैसा लाग्दैन

दुःख गजलमा पोख
पोख्न पैसा लाग्दैन

गरेको कर्मको फल
भोग्न पैसा लाग्दैन

Wednesday, December 2, 2009

सबै सिकाए

मलाई मेरा बाले सबै सिकाए
हुर्काए अनि पाले सबै सिकाए

पढेर ठूलो भएस् भन्थे मलाई
स्कूलमा पनि हाले सबै सिकाए

दुनियाँ स्वार्थी छ बाँच्न जानेस्
यस्तै सिकाउन थाले सबै सिकाए


भन्थे पहिचान छैन खोजेस्
तेरो नाम हो काले सबै सिकाए


यो माटोलाई केही गर्नु छ तैले
दाइ भाइ आमाले सबै सिकाए

Tuesday, November 17, 2009

डर लाग्यो......

गरिस् उजुरी डर लाग्यो
देखाईस् खुकुरी डर लाग्यो

रगतमा समानता छैन
छैन सिन्दुरी डर लाग्यो

को पहाडी को मधेशी हो
नहान छुरी डर लाग्यो

तेरो अगाडि झुक्न पनी
लाग्यो मजबुरी डर लाग्यो

मलाई नमारी शान्त हुन्नस्
मार निष्ठुरी डर लाग्यो

Tuesday, September 22, 2009

राखेर पनि हेरे

ढुङ्गा मुटुमाथी राखेर पनि हेरे
अचानोमा यो छाती राखेर पनि हेरे

जीन्दगी बदल्न मैले के गरिन र
मन्दिरमा फूलपाती राखेर पनि हेरे

तेरो पुर्खाको इतिहास खै के छ भन्थे
छेउ छेउमा किँराती राखेर पनि हेरे

मलाई देख्नेले मान्छे होइनस् भन्थे
अनेक अनेक प्रजाती राखेर पनि हेरे

कसैले पागल भन्थे कसैले गजलकार
तिमीहरु जस्तै साथी राखेर पनि हेरे

Saturday, August 29, 2009

क्या....चमत्कार गरेऊ

अनौठो गर्न थालेर क्या चमत्कार गरेऊ
पानीमा आगो बालेर क्या चमत्कार गरेऊ

सत्य तीतो हुन्छ तीतो नै सत्य हुन्छ
सारा निम उखालेर क्या चमत्कार गरेऊ

जमाना उल्टियो विज्ञानले अवश्य मान्छ
सागरमा ढुङ्गा फालेर क्या चमत्कार गरेऊ

नौ लाख तारा गनि रहे एउटा पुगेन
ध्रुवतारा खसालेर क्या चमत्कार गरेऊ

नभएको भए चित्त बुझाउथेँ अप्सराहरु
छेउ छेउमै बसालेर क्या चमत्कार गरेऊ

पत्थर पनि हातमा चुहिदै पोखिदैँ थियो
एक-एक पगालेर क्या चमत्कार गरेऊ

Saturday, August 22, 2009

थाहै भएन

माया गरेको थाहै भएन
ज्यूँदै मरेको थाहै भएन

कति धेरै सपना देखेथेँ
कति कुरा मनमा लेखेथेँ
सिउँदो भरेको थाहै भएन
ज्यूँदै मरेको थाहै भएन

तिम्रो छेउमा आउँछु भनी
चोखो माया लाउँछु भनी
वचन सरेको थाहै भएन
ज्यूँदै मरेको थाहै भएन

तिम्रो तस्वीर छोइरहन्छु
हरेक राती रोइरहन्छु
आँसु झरेको थाहै भएन
ज्यूँदै मरेको थाहै भएन

Wednesday, June 24, 2009

गजल लेख्न छोडिसके

अस्तिबाट गजल लेख्न छोडिसके मैले
मस्तिबाट गजल लेख्न छोडिसके मैले

चलाउन गाह्रो भयो उस्तै छ त्यो घर
गृहस्थीबाट गजल लेख्न छोडिसके मैले

आफ्ना भन्ने यत्ति धेरै दुश्मनहरु बढे
दोस्तीबाट गजल लेख्न छोडिसके मैले

पारेदेखि दुनियाँले त्यो नजरबन्दमा
गस्तिबाट गजल लेख्न छोडिसके मैले

छैन मेरो पहिचान गाउँलेहरुलाई सोध
बस्तीबाट गजल लेख्न छोडिसके मैले

Tuesday, June 23, 2009

घाम लागिसक्यो

खै उठेको डाँडामाथि घाम लागिसक्यो
हेर फूल काँडामाथि घाम लागिसक्यो

कतिसम्म अल्छी बन्छौ राति माभुनुपर्ने
खाएका ती भाँडामाथि घाम लागिसक्यो

गैरीखेतको सबै मेलो सिध्याउने होला
बिस्तारै झन् टाढा माथि घाम लागिसक्यो

डोको, नाम्लो समात्नलाई कम्मर कस अब
बस्तुभाउ पाडामाथि घाम लागिसक्यो

भन्दैछु म तिमीलाई अब अन्तिम पटक
उदाएर टाढा माथि घाम लागिसक्यो

Friday, June 12, 2009

छापामारको छोरो

देशको निम्ति लड्छु भन्छ छापामारको छोरो
अझै शिखर चढ्छु भन्छ छापामारको छोरो

कुन कारणले मेरो पुर्खा जङ्गल गएको
त्यो इतिहास पढ्छु भन्छ छापामारको छोरो

हात हतियार बम गोली समाउन देऊ
सिमानातिर बढ्छु भन्छ छापामारको छोरो

दुश्मन को हुन् सिकाउनु त्यही छातीमाथि
शूल बनेर गढ्छु भन्छ छापामारको छोरो

बिन्ती मेरो क्रान्तिलाई कुण्ठित नपारिदेऊ
नत्र त्यसै म सड्छु भन्छ छापामारको छोरो

Monday, May 25, 2009

के छ त हुकुम

अब के छ त हुकुम महारानी
उस्तै छ रोल्पा र रुकुम महारानी

मानव भएर खाएँ थालमै चुठायौ
कसरी म त्यही थुकुम् महारानी

हुन त वीर नेपालीको छोरो म त
को कस्को अघि झुकुम् महारानी

कुकुर भन्यौ ठीक छ बफादार भएँ
दैलोमा कतिन्जेल ढुकुम् महारानी

वास्तविकता सब छर्लङ्ग भएपिछ
पर्दा पछाडि किन लुकुम् महारानी

छानो सल्काएर हाँस्छन् मान्छेहरु
कसरी जलेर म दुखुम् महारानी

Monday, May 18, 2009

कुन गजल सुनाउँ

मैले सोझो अर्थमा कुन गजल सुनाउँ
भन कुनै शर्तमा कुन गजल सुनाउँ

मिले जस्तै गरेको तिमीलाई सुहाउने
दुःख पीडा दर्दमा कुन गजल सुनाउँ

व्यापारी हुँ गजलको पसल थापॆको छु
मुनाफा र खर्चमा कुन गजल सुनाउँ

कत्ति भूल गरे हुँला कत्ति गल्ति गरे हुँला
तिमीलाई यो वर्षमा कुन गजल सुनाउँ

एक एक छानी गजल सुनाउन सक्ने
आँट छ यो मर्दमा कुन गजल सुनाउँ